萊德盃上周六打埋第2日比賽，美國隊重心活士，原定當日會做後備，點知隊長盧夫唔知係咪想用激將法、定係放流料，上周六照出「老虎」。不過，呢一招冇乜用，因為活士當日都係要輸波收場，還好美國仍然以10:6領先，唔係佢就變「甲級戰犯」。
上周六活士淨係打咗下晝4人球賽，同第1日拍檔史積加再聯手；面對加西亞同當奴兩位球手，活士隊輸1洞，連輸3場，真係灰到喊出嚟。還好，美國當日憑住上晝4人組賽發揮出色，將領先優勢拉開到10:6，今日單對單拎多4.5分就夠贏。今日打得咁好，或多或少同籃球「波神」米高佐敦，親身到場睇波，激發美國球員士氣有關。呢位籃球名人堂成員，仲同歐美兩隊隊長合照，實行「友誼第1，比賽第2」。
至於今日單對單賽事，歐洲隊王牌麥艾萊就會對巴特利，而活士就會對莫利拿尼。