全靠法比加斯喺下半場翻生，梅開二度，為巴塞隆拿喺落後0:2嘅劣勢下追成2:2；加埋韋拿補時絕殺，險過剃頭咁作客贏西維爾3:2，保得住聯賽全勝嘅招牌。
入兩球兼惹對手領紅
話晒今季主場都贏過皇家馬德里，西維爾真係冇驚過巴塞；上半場嘅法比仔就好似未瞓醒咁，成日斷波，俾對手係咁打反擊。26分鐘，西維爾中場杜查奧斯基禁區左腳抽射，因為丹尼爾遮一遮，個波就喺域陀華迪斯手邊入。48分鐘，西維爾嘅尼格度壓過桑治入禁區，幫球隊入多球，贏到2:0，睇怕穩陣嘞啩！
不過，法比仔突然蘇醒，好似變咗個水泡出嚟咁，將巴塞由輸波嘅邊緣拉番上嚟。53分鐘，佢喺峨嵋月頂撞射破網，幫巴塞追番球。72分鐘，西維爾嘅加利美度喺吹罰後拖延時間，法比仔同佢唔知講咗啲咩嘢，加利美度突然用頭撞向法比仔下巴，球證即刻畀張紅牌佢。靠法比仔出口術，西維爾踢少個。
人多打人少嘅巴塞去到89分鐘追平；雖然堤亞高艾簡達拿手球在先，但球證冇吹罰，個波輾轉落喺法比仔腳下，幫巴塞追成2:2。1分點夠！氣勢如虹嘅巴塞㩒住嚟攻，補時階段由韋拿奠定勝局，驚濤駭浪下險勝西維爾3:2。教練維蘭路華當然點名稱讚法比仔啦：「佢總係帶住拼勁去比賽，有機會就向前衝，我都唔知佢今場跑咗幾多公里，希望佢恢復得切，喺嚟緊星期二踢歐聯啦。」
C朗要皇馬加1倍人工?
另外，呢排各大傳媒不斷報道皇馬球星基斯坦奴朗拿度（C朗）唔開心嘅原因。英國《每日郵報》話，原來C朗唔止嫌人工低，佢直情想做全球最高薪嘅球員。家C朗年薪798萬鎊排第10，而排第1、安治嘅伊度奧就緊1,591萬鎊（約2億港元）；若果皇馬真係滿足佢，就要加薪成倍！