聽着「手中緊握車匙，追不到往事……」唔經唔覺陳柏宇（Jason）出道已六年，大碟出過電影拍過，即將三十而立的他待人處事變得更成熟，自言心態都改變不少，所以終於的起心肝考電單車，考完牌仲要買大馬力街車。等等，乜唔係成熟咗咩？「其實我心底想有轉變、突破，揸車都唔例外。」大細路的性格，始終無變。 記者：李鑒泉 攝影：林栢鈞 髮型：Kiff Lui@ P.O.P Hairdressing 服裝：Y-3
筆者約Jason訪問時，經理人事先落閘指他只拍硬照不會試車，結果訪問當日他還是拿着頭盔到場，見到新車更是左看看右望望，「我好細個已經鍾意電單車，16歲那年與母親揸綿羊仔遊古巴，感覺好好玩又舒服，點知回到加拿大後母親卻不准我考牌。入行後終於能負擔養車開支，兩三年前已經想考牌，但不過無朋友一齊考，結果等到去年年底終於考得成。」考牌一波三折的Jason，今次原來都先斬後奏，瞞着家人學車，「可能係心態唔同咗，以前唔會太逼自己去做一些事，現在可能會執着咗同埋想參與多啲，揸車都係一樣。」家人得悉後反應不大，「只係婆婆一直擔心至今，雖然電單車意外率與私家車差不多，但意外的嚴重性卻大得多。」他指幸好自己有路面經驗，知道其他車大約何時爬頭切線，加上成長後心態都會更淡定，大大增加行車安全性。
甩P唔載女友
雖然牌齡只有半年左右，但Jason已急不及待買入馬力87匹的Ducati Monster 796作為腳車，「起初，我有想過買細容積跑車，但怕馬力不夠，一起步就買一公升級跑車又怕操控不來，加上我鍾意意大利車，所以就買了Monster。」他盛讚該街車容易適應，平常均用它出入代步，但工作時就不會揸，「除了頭髮被頭盔壓平外，好似我今日着窄腳褲，每步都要小心翼翼，有時流鼻水打噴嚏都感覺好核突。」Jason自稱揸得小心穩陣，「見到落雨我一定唔揸，因為P牌限速70km/h，亦會睇通路況才會爬車，所以無問題。」但轉頭卻說試過揸車玩「磨苞」（Knee Draging），真係唔知邊句先真。牌齡半年的他也遇過驚險事，「試過在迴旋處輾過機油，有一刻以為自己會跣出彎，幸好即時呼油才化險為夷。」未試過炒車，跌車反而試過，「試過買早餐時因太匆忙忘記放下腳架，結果一走開就跌車，好在無撞花。」甩P會唔會載女朋友？「應該唔會，一來女友家人唔鍾意，二來我試過坐友人車尾覺得好危險，成日諗一震就會整個人往外飛，都係自己揸算數。」
舒服街車
估唔到第一次揸寶馬F 800R的Jason竟然極速上手，「F 800R加速線性，與Monster很不同，感覺好舒服，較直立的坐姿方便日常使用。第一次用前後聯動ABS會不自覺重扣煞車掣，需要點時間適應。」F 800R名氣不及超跑S1000RR及越野的GS系列，但駕駛感及售價都更平易近人。新車配備一台能輸出87匹馬力的798cc水冷直二引擎，用上傳統直立避震及六前速波箱，揸慣日本街車的駕駛者毋須重新適應。加上只有800mm的座高，即使身材不高大都能雙腳掂地，加強安全感。除大細眼頭燈外，廠方將兩側啡軨與油缸連接成為巨型盔甲，更見有型，難怪Jason最後都出口術問代理，「如果可以借畀我揸一排就好了。」
BMW F 800R
引擎：798cc 水冷直二
馬力：87hp/8,000rp
扭力：86Nm/6,000rpm
傳動：六速棍波，鏈動
售價：$133,000
查詢：3129 9148（BMW HK）