幫完工黨助選嘅中大學生會前會長黎恩灝，喺立法會選舉結束後就即刻出發飛去英國留學，展開佢喺倫敦政治經濟學院讀社會學碩士課程嘅留學生涯。香港嘅朋友仔可能太掛住佢啦，有同學就幫佢做咗張山寨改圖，將佢塊面嘅上半部，同中大政政系高級導師蔡子強嘅下半部合體，唔通想預示吓，一年後學成歸來嘅黎恩灝，會走番學者路線，做下一個學界「黎恩強」，又或者係政界路線做「黎子強」？佢啲朋友都覺得，呢個山寨合體效果非常完美，一堂粗粗嘅眉同埋滄桑嘅鬚根，異常咁夾，喺肥仔裏面有蔡子，喺蔡子當中亦見肥仔，但有人覺得肥仔個新look「好鬼悍匪」。