喺接連出醜嘅梁粉班子內，少做少錯嘅財爺曾俊華鬍鬚曾，幾乎成為「清流」，相信唔少市民開始懷念，AO治港嘅有規有矩好年代。睇怕鬍鬚曾一定好樂得清閒，佢上星期就去咗台灣訪問三日，預咗佢冇乜特別好消息公佈，但就見過唔少台灣政界猛人；最開心嘅莫過於同極力推動兩岸三地交流嘅國民黨榮譽黨主席連戰會面，因為連戰係佢好尊敬嘅前輩。
原來鬍鬚曾喺台灣都有唔少老友記，好似台灣經濟部長施顏祥，就係佢麻省理工嘅校友，佢話大家都對促進港台經濟合作有共同願景。至於財政部長張盛和呢？鬍鬚曾就大讚對方係一個實幹而富有幽默感嘅官員，講到幽默，其實又有邊個及得上佢自己呢？