自細愛聽收音機，差不多乜嘢類型節目都聽過，就係未聽過電台會執笠；係喎，由細到大見盡報紙摺埋、雜誌倒閉、電視台都有拉過閘，就係未見識過香港有電台要「冚旗」。所以當DBC數碼電台出世無耐就會可能要夭折時，反而刺激起我呢啲癡情電台迷去追來聽；「頂住呀、頂住呀！」一邊聽一邊好似睇住愛隊俾人圍攻咁肉緊，只不過最頂癮係隨時聽聽吓突然無聲，「吓，唔係執得咁突然吓嘛？」「唔係，係訊號收得差啫！」唓，又話新科技嘅，收得仲差過當年56K上網嘅，一邊媽叉，一邊又鬆一口氣。因為鍾意聽電台，所以求學時期都博懵去投考DJ，結果當然係肥佬啦，但兜轉之後因為講波的關係，結果又有機會踏足過每一家電台，一圓少年十五二十的癡想；只不過每間電台雖然都曾經製作過足球或體育的節目，但通常都命不久矣，原因？太多，不能盡錄。其實自從手機乜都得之後，自己愛上了聽台灣電台，因為有音樂show，而且DJ聲線溫柔動聽，與香港主流的噪音風格截然不同。肉體不能移，靈魂可出軌，10點前特首的年代，從來對大班敬而遠之，怕了「康港」式的吵耳，但從年頭開始卻自投羅網；因為亂世，所以開始渴求更多的聲音，去明白此時此地還有甚麼選擇。聽唔聽係我自己揀，之但係若果有日冇得揀，咁惟有揀唔聽。一直有個偏頗的印象，收音機係相當有生命力的。睇過唔少災難片即如《20世紀少年》入面，被摧毀後的一片瓦礫之中，最令人閃出希望嘅，係收音機傳來的聲音；「有聲呀，有音樂呀……」你就知道自己不孤獨，處處散發利物浦精神！香港人素來沒有甚麼危機意識，但我倒是貪玩的收藏了兩部不用電的收音機；只需要扭動機身控捍就可發電，有光又有聲，遇上天災時啱使，如廁時百無聊賴亦好用。前兩天又在扭扭吓時，聽到DBC傳來一位開朗DJ的聲音：「人哋呢幾日成日問我幾時last day，我剩係知道，我哋仲有大把好時光！」素未謀面的一句說話，卻不知不覺感染咗其他人，包括我，謝謝你湯正川！文：keymannow TV主持mailto:[email protected]