老友P約吃午飯，話明由佢做主場，唔到中環灣仔遷就左丁山，佢在電話講：「帶你走出港島旺區，周圍發展得幾快，你要走出中環，嚟體驗吓」，佢第一個提議話去大埔大元街市，左丁山嚇咗一跳，唔識噃，點去呀？老友P話大元街市可能係全香港最新穎嘅街市，帶張八達通可以買齊菜肉鮮魚雞，兼且乾淨企理，街市內有靚嘢可食，哎吔，由中環去大埔食午飯，始終係太遠，留番星期六日再與家人揸車去搵啦。（後來先知道，蘋果日報副刊有成版講大元街市。）拉扯一輪，卒之達成協議，去坐地鐵可達嘅樂富商場。講起樂富，回想番好似十幾年冇去過，以前去樂富，出咗地鐵就入吉之島，買完嘢就搭番地鐵鬆人，甚少行十分簡陋嘅商場。
呢日坐地鐵到樂富，嘩幾乎唔認得咯，乜咁新穎㗎，雖然唔及又一城咁正斗，但同印象中之房委會商場完全不同，而且人流不少，週中午飯時份睇嚟有不少人來此吃飯購物，好快就搵到「美食廣場」，見時間未到，於是行咗一個圈，裝吓啲價錢，見到有一間嘅價錢幾平民化，一碟飯賣32元，但有食客在門口排隊輪號碼嘅，就係一間價錢較高嘅上海菜館。咦，原來老友P就企在門口，等左丁山行入去。
屋邨商場大變身，追上時代潮流，幾啱樂富區現狀吖。一位親戚表弟以前讀書時，佢父親在老虎岩街邊賣燒味，佢幫完老竇手就坐在生果箱讀書，因升中考試成績好，竟然派入皇仁書院，在沒有地鐵年代，由老虎岩去皇仁返學，可說路途遙遠，但因為入到皇仁而考到港大，後來成為工程師，老竇年老唔駛再在街頭開檔咯。老虎岩已成為樂富，數十年前入住嘅徙置區公屋人士，不少已成為中產，子女有成者甚眾，屋邨商場變身成為比較現代化商場，係好自然一回事。飯後再在美食廣場（Food Square）行一轉，見到有一間劉裕發茶莊，名字似曾相識，入去睇吓，咦，乜嘢名茶都有得賣，唔會差得過名店英記茶莊噃，老友P話呢間茶莊於1972年在東頭邨開始，在樂富商場經營三十幾年，係地區老牌名店嚟㗎，唔怪得啦，呢塊招牌以前係見過嘅，老店能追上時代，穩步向前，不受潮流變化所淘汰，可喜也。