睇湖人比賽，見到加素蓬鬆嘅頭髮同埋生滿面嘅鬍鬚，有時覺得如果佢唔係着住件波衫，似露宿者多過球員。佢最近上咗西班牙雜誌《DT》封面（圖），只見佢擸番好個頭，整理番好個樣，即時成個型佬格出晒嚟！輯相以優閒為主，加埋啲燈光，第一眼真係認佢唔出。呢位32歲大前鋒呢輯相好chok，憂鬱嘅眼神，唏噓嘅鬚根，差杯Dry Martini喎！