陳崇輝跟不少本地投資銀行家一樣，都是百富勤出身，他在「百記」的日子不足三年，卻「有幸」見證其「執笠」的一刻，雖然已是14年前的事，但他當晚攬住班師兄弟大喊的情景仍然歷歷在目，直言在「百記」的日子對他有很大影響。
見證公司清盤收場
陳崇輝96年加入百富勤的企業融資部，效力的是最當時得令的中國組，曾經參與北京控股（392）的上市；可惜「歡樂的日子」過得特別快，97年百富勤因投資的印尼債券大幅下跌而陷入財困，最終於98年清盤收場。「由於住得近，清盤當日我係第一個返到公司……更有份參與草擬當日寫畀官場領導嘅求情信，可惜都係要執。」陳崇輝續稱，「百富勤嘅中國組係最賺錢嘅部門，但被人拖累要執，覺得好傷心，嗰晚成班師兄弟攬住一齊喊。」相對入職較早的師兄，陳崇輝算是「新丁」一名，但受影響卻甚深，「初初喺百記嘅日子好似地獄咁，家人、女朋友、乜嘢尊嚴都要放埋一邊，日做夜做，好似機械人咁……頭一個月自己唔能夠調整，根本生存唔到。」他說，對一個剛畢業的後生仔來講，若能夠入百富勤「鍛煉」一下，對其人生會有很大啟發。在英國念書的陳崇輝自問英文不差，「當時寫封好短嘅英文信，100字以內，但畀老細捉入房，指出多個錯處……」「百記的公司文化是『can do』，冇嘢唔可能，A唔得就B，B都唔得再諗其他……如果能夠捱到半年唔走人，真係成世受用。」的確，目前在市場有名的本地投資銀行家，不少都是出身於百富勤。對於陳崇輝，除了練得一身武功，百富勤還帶給他一班良師益友，「我哋嘅年紀，朋友最重要，我家電話WhatsApp有個群組，就係百記班師兄弟用來溝通。」