NBA就快開季，大部份球員都已經歸隊，剛剛上星期五個傳媒日，好多人都將焦點放喺今季力求衞冕嘅熱火身上，「大帝」勒邦占士就梗係想球隊可以變得更勁、更可怕啦，仲試埋佢球員生涯第一隻冠軍指環，鬼咁風騷。反而小馬晒新兵就失色好多。
打咗9年NBA，占士喺上季終於第一次贏到總冠軍，熱火又點會放棄呢個機會晒吓命？試戒指嗰時，佢第一次就覺得太鬆，儍吓儍吓咁問：「係咁鬆㗎？」之後再試細一個碼，今次就fit晒啦，除嗰時仲玩個工作人員，話人哋掹得太大力，要自己除。
之後占士接受傳媒訪問時話，球隊增兵得到3分王阿倫同路易斯，實力可以更上一層樓。上季贏晒常規賽MVP、總冠軍同倫奧金牌嘅佢話：「我哋有潛質變得更勁到得人驚！」不過隊友獲迪膝傷仲未好晒，季前賽已經唔使預佢咁滯，仲有可能連開幕頭幾場都冇佢份，熱火都係要靠「大帝」孭飛。
德國槍死撐小馬
至於另一邊廂小馬，今季擸唔到懷特侯活同迪朗威廉士，只可以死死地氣着眼下一季自由身市場，所以今年只能入啲好似基文、白蘭特呢一類聯盟二線兵。
不過，隊中王牌、「德國槍」奴域斯基依然力撐今季可以有一番作為。佢話：「上年我哋其實都可以釣到大魚，不過最後唔好彩入唔到貨。」對於球隊今季只係入啲平貨，「德國槍」力撐球隊政策：「我覺得我哋隊波依然好強喎！」唔係話你隊波渣，但係想贏總冠軍，真係有難度囉。
