唔好以為「大富貴」日日都要去飯堂開餐，其實都有例外，關仁早排去中環一間茶餐廳食嘢，見到大富貴同咗佢嘅大肚女友開餐，嘆奶茶同雞扒麪，真係估佢唔到！大富貴有成班保鑣同行，聲勢浩大，又撞正係中午食飯時間，所以好多人都眼望望。
食客一肚氣
不過，最爆係關仁聽到有保鑣同侍應講，話要攞埋大富貴旁邊嘅幾張枱，唔准人坐，仲話畀番錢佢哋，咁霸道，等緊位嘅食客自然一肚氣啦，但侍應最終都順大富貴意，畀佢包埋其他枱。關仁記得大富貴當年同「減分」一齊，試過睇戲時都買埋前後左右嘅位，以免俾人聽到佢哋傾偈，估唔到大富貴連食飯都要咁做法。
Text by關仁