從種種跡象顯示，陳小春屋企是有一隻河東獅。小春結婚兩年，今年有狐妖向陳太挑機，陳太即時還擊，高調宣示主權之餘，更威脅要公開短訊女狂徒姓名和電話，成功嚇退小三，出手快狠準，令所有大婆嘆為觀止。躁漢小春，內地登台撞正狂莽酒徒無禮對待，掟咪離場，闊佬懶理賠錢得罪人，卻在生命中遇上比自己更強更躁的天煞剋星——應采兒（小丁）。對着老婆，小春變鵪鶉，仍然今生無悔，他用堅定不移的眼神和絕對肯定的語氣，告訴大家，點解我老婆是應采兒：「佢係壓倒我，唔惡真係壓唔到我，好在我老婆夠惡，That's why，唔係呢個point我唔會揀佢。」犯賤，陳小春是也。
撰文：楊潔雯
攝影：林德雄
服裝：WDSG Art & Craft Dept.
在一小時的訪問中，陳小春暢談甜酸苦辣的婚姻生活，期間他經常一人分飾兩角，陳生和陳太，陳生是一隻被馴服的洛威拿，而陳太就是那強悍的馴獸師，畫面生動有趣。
西班牙嘆惹火湯
野性難馴的洛威拿被馴服，是心甘情願的，因為小春很愛這個家。哪怕是倆口子吵吵鬧鬧的生活點滴，一樣不介意跟大家分享，他傻笑着說：「我老婆叫我唔好乜都同人講，不過，呢啲係小趣味，唔緊要喇！就試過有一次去旅行，佢攞住個Google map搵地方。」面前陳生突然出現，陳生說：「老婆去邊度食嘢呀？」陳太舉起食指：「！」陳生再發問：「我想飲湯，嚟咗個幾禮拜未飲過湯喎！」陳太塊面立即變黑，說：「湯湯湯咩！嚟到西班牙飲湯。」黑面陳太找了一間中菜館，陳生叫了一碗酸辣湯，飲了一啖，說：「好難飲呀！」陳太七孔生煙，連珠炮發：「人哋話咗呢度好難飲，你有冇睇評論呀？話咗你㗎啦！又話要飲湯……」故事未完，陳生死死氣跟住陳太找到一間博物館，陳生見門外大排長龍，拋下一句：「嘩！咁多人排隊嘅！」陳太怒氣沖上雲霄，怒睥陳生一眼，然後咆哮：「你唔好咁嘈好唔好呀！畀我靜下得唔得？」以上是陳生陳太其中一則旅行趣事。
事後檢討學相處
小春即場做了一次事後檢討，他說：「我之後諗到，點解佢咁躁，佢鍾意plan嘢，又搵緊地方，我就喺側邊咿咿哦哦，去到博物館咪叫我咪嘈囉！雙子座係咁，一下就沖上去，我係巨蟹座咪鵪鶉囉！」時至今日，小春仍未能完全掌握老婆的思潮起伏，他說：「我同佢爹哋媽咪仲易溝通，家仲摸緊阿丁，三日一小鬧，五日一大吵，初初嗰時真係下下都要頂，下下都要贏，唉！畀着我以前走咗喇！不過我家試用方法，就係lay back，讓畀佢搞任何嘢，我係算捉到呢一下，畀佢噴噴噴，我就係係係，係我錯，講對唔住認錯，所以家相處OK，摸到大家相處方法，冇壞，家英哥都話，信老婆會發達，我信老婆，唔會窮！」話說回來，明知自己吊兒啷噹，揀老婆，娶一個精明能幹的管家婆，絕對是明智之選，小春先搖頭再點頭說：「佢係好smart，佢管住頭家好過我管，往往佢顧住頭家瞻前顧後太多嘢，我叫佢唔好擔心咁多嘢，佢又會話『乜乜乜唔使擔心，一個月支出咁咁咁，你老竇細佬妹，咁有BB咁又點呀！』跟住我就開始潛台詞，由得佢怨，不過，我只係覺得有手有腳，有嘢做就唔使擔心咁多，無耐我老婆就係鍾意plan嘢！」
女尊男卑妻管嚴
經小春證實，陳太是一名有潛質的管理人才，絕對可以由管家婆，搖身一變成為CEO，他說：「好似去旅行，無論係成班人或者兩個人，佢都好鍾意安排，酒店機票一定要清清楚楚，幾時幾時，約咗就係嗰時，唔可以提早或者推遲，有時做嘢好難講，我咪話：『唔知㗎！』講完即刻俾佢插：『唔得！約定喇！同公司請定假！』」。為了激發陳太的潛能，小春決定成立製作公司，讓陳太大展拳腳，他說：「佢有頭腦，有sense，總之電影、電視、新人都可能會簽，有人打理，我又忽發奇想可以做，嚟緊係會向住呢個方向做。」表面上，女尊男卑，換個角度看，陳生成全了一個和平的家，造就陳太成為一個出色的管理人，是一個雙贏的局面。講到生兒育女，陳生陳太難得意見一致，現正火速造人，小春說：「得喇！放心，好快，老婆都有煲湯畀我飲，點教都諗埋，仔女我都錫到燶，我係要做好人，係打都係我老婆打，同埋老婆一定會教得好，見到佢平時嘅行為，佢屋企係好注重文化教養讀書人。」
【事業篇】慘情歌王回歸香港
陳小春長期在內地拍戲，已經是半個內地人，不過他仍然心繫香港，他說：「我冇話放棄香港市場，香港有人搵都要睇做乜嘢先，當然嚮往喺香港做嘢，可以返屋企瞓自己張床，又可以多啲見班朋友。」
歌癮發作
除了演戲，小春的《犯賤》、《獻世》、《神啊！救救我》和《失戀王》，首首悲情哀歌打動人心，他去年加盟黎明AMusic以單曲形式推出多首新歌，先有跳舞主打歌《別碰我的人》攻陷內地舞池，成為熱爆disco music，最近又再推出撚手的傷感慢歌《難怪》，回歸香港樂壇，他說：「歌癮一定有，其實我出唱片開始已經係不景氣，但係好多片公司都未執，但係香港樂壇，真係摸不着頭腦，我覺唱片已經死，只有音樂同歌係唔會死，所以我只係出歌，仲會開演唱會。」
