出任法律界議員至今17年嘅公民黨吳靄儀，噚日晨早6點就起身整餅，為同傳媒行家嘅告別茶敍做準備，估唔到茶敍最終出現特別嘉賓。收到風嘅長毛突然踩場，向吳靄儀送上《這是我最好的愛》一書，話知道吳靄儀最鍾意王爾德作品。
曾私下勸佢唔好發火
問到點解長毛同佢情投意合咁啱傾？吳靄儀話雙方都直腸直肚，應做嘅事就義無反顧去做。長毛大讚吳靄儀夠堅持，話如果冇佢，五區公投未必搞得成。吳靄儀席間爆料，指一向火爆嘅長毛，曾私下勸佢喺議會發言唔好發火，係咪好搞笑呢？
對於鼠王芬有意做司法及法律事務委員會主席，吳靄儀當然有保留，話由95年開始，主席一職都係由法律界議員出任。至於佢嘅退休生活，就係專注大律師事務，稍後仲會出書講飲講食，黨方面就會退居幕後嘞。