Band sound令四個女孩子走在一起，雖然人們常說「夾band搵唔到食」，依然有很多死忠派不顧一切追尋夢想。Choco希望在男性主導下的band界起革命，告訴大家Rock不是男生的專利，女生都可以有屬於她們的快樂搖滾。
撰文：李珮洳
女子樂隊Choco由Mel、KiKi、Cathy以及Nova組成，Mel與KiKi是多年的好朋友，十多歲便認識，其後因為睇band騷而結識了Cathy，而Nova則是由結他老師介紹認識的。而Choco的前身是地下樂團Pinkberry，獲現時的經理人公司垂青，Mel說：「我哋之前有啲公開演出嘅片放咗上YouTube，家嘅經理人睇到就想同我哋簽約，佢話香港冇一隊純女子band，呢個係想簽我哋嘅原因。」
家人撐入行
相信很多家長都希望子女專注學業，band友更可能是家長眼中的壞孩子，幸好仍在求學的Nova獲家人支持，她說：「屋企人知道夾band係我最鍾意嘅嘢，佢哋知道我有機會實現夢想都好戥我開心，簽約時都同經理人傾過，工作安排會盡量配合返學時間，遇到考試時有嘢做，我就唔會出席。既然屋企人咁支持我，我都同佢哋承諾絕對唔會放棄讀書。我唔使返學就係去夾band，一定唔會周街去，反而屋企人認為呢個係好健康嘅活動。」
女子組搶灘
在一個男生當道的樂隊環境中，Choco樂觀地認為女子組合反而可以殺出一條新血路，Cathy說：「就係因為男仔band太多，從來都冇一隊全女子組成嘅band，呢樣嘢已經係第一樣吸引大家注意力，同埋我哋啲歌少女口味重啲，可以吸引一批年輕嘅歌迷，總之唔簽都簽咗啦，決定咗去做就要放膽去做，唔驚得咁多。」
夾錢租Band房
經濟因素絕對是新人要考慮的問題，鼓手KiKi一早預計到入行初期根本不可能賺到錢，所以向家人「預告」了會有一段時間沒有家用，她說：「我之前做嘢一直畀家用，最近都同父母講暫時畀唔到住。其實喺我中四時，父母已經畀錢我去學打鼓，當時學費都唔平，所以家佢哋知道我可以將打鼓夾band變成自己嘅事業，佢哋好支持我、仲叫我一定要好好把握呢個機會。」
訪問當天去到Choco位於牛頭角工廠區的band房拍照，一個200呎的開揚單位，月租5,200元。由於要長期開冷氣，相信每期的電費亦要過千元，對於收入不多的她們來說都頗為吃力。Cathy透露她們與另一隊band夾錢租，她說：「總之成條數我同KiKi、Mel就每個月畀700蚊，Nova仲讀緊書只需要畀500，由於佢有學生優惠，好多時佢都會負責做清潔，當然我哋個個都好有手尾。」夢想除了要用恆心及毅力去令它實現，金錢亦不可缺，希望有夢想的人可以堅持下去！
服裝提供：PENNY BLACK
髮型：Jack Lau of P.O.P Hairdressing
