林鄭月娥早前北上訪問三日，「正印」特首狼振英看在眼裏，或者不是味兒，有啲酸溜溜咁，但唔少公務員嗰段時間相當興奮，皆因林鄭出名打得又做得，一日24小時on duty都no problem，嚇到唔少AO唔敢早過老細收工。梁振英似乎都係「受害人」，因為AO圈子流傳，梁振英幾乎同林鄭日日鬥遲放工，用工時比拼管治嘅熱誠咁話喎。
唔敢準時收工
講真吖，林鄭月娥樣樣嘢都咁上心，塌樹、膠災、國教兼水貨客都要搞，唔用晒24小時瞓身工作又點掂？所以好多AO都話，林鄭遲放工絕對唔係新聞，未到8點都唔肯走人啦，除非出面有應酬活動啫，結果當然係佢下面嘅一班AO都唔敢準時收工去happy hour。
無獨有偶，特區第一把交椅狼振英，據聞都有遲收工嘅「癖好」，AO們當然懶得理。究竟狼振英本身都係鍾意留喺辦公室多啲吖，抑或係受林鄭刺激，你收8點我就收9點？有人就覺得後者原因居多，事關若然狼振英畀人感覺冇副手咁勤力，顏面何存？尤其喺市民心目中，民望已經大落後於林鄭，冇理由再喺勤力呢方面輸多一仗㗎！
有AO就呻，呢兩位大哥大姐鬥還鬥，唔好影響做細嘅吖，事關只要兩位阿頭唔走，好多人都唔敢收工，俾老細搵正你而你唔喺度，死罪嚟㗎嘛。睇怕喺狼振英同林鄭管治下，AO唔再係一份好好打嘅工咯。
mailto:[email protected]