馮仁昭四圍超：
Mia獻身做細細粒 - 馮仁昭

性感媽模陳靜儀（Mia）前晚着件黑色性感低胸吊帶裙，喺尖沙嘴一間酒吧打碟，吸引唔少酒客捧場，不過就唔見佢男友撐場。前日本報報道王晶將重拍當年好受歡迎嘅《古惑仔》系列，諗住搵羅仲謙做陳浩南一角，今年23歲嘅Mia自爆話好鍾意睇《古惑仔》，如果真係翻拍新版，佢自薦演黎姿細細粒呢個角色。

愛上肌肉男

唔知係咪真係咁恨演出，Mia竟然話由細開始練黐脷筋，所以演呢個角冇問題喎，馮仁昭計下，Mia當年只得7歲女，唔讀好書走去練黐脷筋，啲小朋友真係咪鬼學。之後Mia又話同周秀娜男友陳偉成（Avis）合作完電影《喜愛夜蒲2》後就鍾意大隻仔，所以好想同羅仲謙合作。不過羅仲謙最近有單車廂事件，Mia就話：「我知有間牛腩撈粗好抵食，我唔介意帶佢去食，等佢多個選擇。」
此外，陳小春噚日喺微博放咗張同鄭伊健、謝天華、錢嘉樂等一班《古惑仔》兄弟，仲有導演劉偉強同曾志偉嘅合照，相信佢哋相約食飯敍舊。除咗Mia想做細細粒外，就連林盛斌（Bob）都毛遂自薦做「肥佬黎」角色㖭。