【灣仔】
聽日係一年一度中秋佳節，李嘉欣前晚特登提早同老公許晉亨以及老爺奶奶去灣仔福臨門食飯做節，亨亨同吳婉芳老公胡家驊一向老友鬼鬼，前晚胡家驊同吳婉芳兩公婆都有出席亨亨一家飯局，認真熱鬧。不過，美中不足嘅係嘉欣冇帶埋一歲多嘅囝囝許建彤（Jayden Max）出嚟，估計係嘉欣覺得囝囝年紀太細，暫時唔適合出席呢啲大人飯局。
先送父母離開
嘉欣同亨亨一早到咗福臨門，佢老爺許世勳同奶奶食到夜晚10點半就走先，亨亨一個人送爹哋媽咪出門口，由於兩老年紀唔細，行得比較慢，亨亨就好小心翼翼咁傍實兩老上車，之後仲畀咗幾個泊車職員每人100蚊貼士。
大?15分鐘之後，亨亨同嘉欣十指緊扣離開，同行仲有吳婉芳兩公婆以及其他親友，嘉欣同吳婉芳揮手拜拜之後就上車，亨亨先送老婆上車，認真體貼。
採訪、攝影：陳辰、黃曉程
