人生從來就是本末倒置，劉心悠24歲入行做阿嫂，今日31歲剛出頭，反過來在導演葉念琛的新作《天生愛情狂》演野蠻女友，電影就是這樣多姿多采，化不可能為可能。回想初入行拍喊戲要導演逼、幻想家人死才勉強哭出來，現在已能悟出喊的不同層次，跟當日雲遊片場的初哥不可同日而語。被高登巴打暱稱「心悠BB」，可惜的是廣告演出，比電影角色更深入民心，更反高潮是賣嫁女餅賣到開巷，但最想要的不是一個家，是要獲人讚賞演技。
撰文：何永寧
劉心悠拍過的廣告不少：纖體、脫毛、護膚品……最為人津津樂道的是叫人「給女孩子一個家」的嫁喜餅廣告，反而令人印象深刻的電影角色欠奉，對一個以演戲為事業的藝人來說是個反高潮。入行伊始就獲六大影帝拱照，拍了黃精甫導演的《阿嫂》，好的開始卻是件苦差。
幻想喪親谷眼淚
台灣姑娘往加拿大求學，到香港發展，心悠從來都不知演戲為何物，到片場開工眼見身旁位位影帝好整以暇，打牙骹度日，自己就惶惶不可終日，心悠說：「自己嘅廣東話唔好，試過問秋生教做戲，佢話『阿女，做戲冇得教㗎，你演多啲咪好囉』，志偉拍完就匿埋瞓覺，惟一可以傾就係講國語嘅劉燁，佢都係同我講戲冇得讀，要靠經驗，嗰時都唔知有冇第二部，點攞經驗。」
港片指定動作改劇本、飛紙仔等，足以令心悠頭昏腦脹，有一日還被導演黃精甫叫去拍一場喊戲，心悠說：「導演話『心悠一陣你要喊呀，你要幻想自己好慘咁就得』，我同自己講一定要喊得出，然後就匿埋培養情緒。最簡單諗失戀，點知諗番自己幾次分手都好和平冇嘢好喊，最後惟有諗公公、婆婆、爹哋、媽咪唔喺度，越諗越慘先至喊得出，仲喊得好慘。」
同一條橋用多了就會舊，每次都是親人離世的方法漸漸沒用，心悠說：「成日都係呢個死嗰個死，死死吓都唔傷心，導演惟有教我另一個方法，就係寫日記，每日寫低自己演嘅角色，慢慢代入自自然然就喊到，到家變成一種習慣，每部戲都有寫。」
心悠演戲真正開竅還要待外闖拍電影及演出舞台劇，她笑說：「以前拍公司戲就算我擋住啲光，對手都唔會出聲，燈光師傅仲會移開枝燈就番我，冇人會同我講。到拍出面嘅戲，你擋住啲光，第一時間對手會黑面，你都仲唔知乜事嘅時候，燈光師會出聲鬧，嗰時先知『原來咁唔得㗎』，自己公司開戲，人哋點會得罪你。」
高登女神不恨嫁
經驗從跌跌撞撞儲回來，實踐加上進修演技，心悠雖未至爐火純青，至少可以得心應手，她說：「經驗係好重要，不過有理論支持會容易吸收，至少家都分得出唔同喊法，有失戀、有傷心、有失意，唔使吓吓都諗自己屋企人死先喊得出咁大吉利是。」
心悠在高登網站被奉為「心悠BB」，給她一個家是不少高登巴打的夢想，不過31歲女神依然不恨嫁，「一個家」是廣告商一廂情願的宣傳口號，當日由加拿大隻身來港發展，不想浪費經營七年的苦心，心願除演不同角色外，還有是買起「數碼港」，她說：「同余文樂拍過鄭保瑞套《軍雞》，都算好大膽演妓女，今次拍葉念琛套《天生愛情狂》都算係新嘗試，演野蠻女友，同以前乖乖女戲份唔同，好老套一句都係希望多啲人認同。喺網上俾人讚當然好開心同多謝，不過可唔可以唔好叫我BB呀？另外，都係想買樓。哦，數碼港唔係樓盤，貝沙灣至係，咁買貝沙灣都好，咁貝沙灣喺邊呀？」
葉念琛「癲」覆愛情觀
從現實取材的三角年輕愛情故事，從來都是導演葉念琛那杯茶，由一刀捅死你的電影《獨家試愛》到新作《天生愛情狂》亦如是。《天》片靈感來自一則女護士騷擾前度男朋友的新聞，他說：「故事緣起睇到新聞話有個護士同男朋友分手，但係特登買層樓住前度樓下，成日搵前度最後鬧上法庭，我覺得拍成電影會好睇。」
奪命追魂Call
葉念琛指假如以往方力申跟鄧麗欣所演是兩性的純愛較技，今次就可用癲來概括：「心悠要演一個愛得好癲嘅女朋友，無時無刻要搵到男朋友，男友要24小時on call。現實中你身邊男性朋友都係咁，同佢食餐飯會見佢電話成日響被問喺邊，可能會覺得好正常，不過一日20個call發展到過百個，件事就會變得好癲。所以搵兩個靚人劉心悠同張智霖去平衡番，話畀你知我唔係拍緊驚慄片。」
葉念琛專注愛情電影從不覺局限，他說：「導演要有自己風格，我一年拍唔到七部片，都想拍啲表達到自己觀感嘅戲。拍警匪片大把人叻過我，我都係30幾歲，往後10年點走未知，至少愛情片我仲有大把空間。反而我寫嘅劇本容許有唔同題材，編劇責任係滿足導演，好似我幫彭浩翔寫過《大丈夫》，仲有《行運超人》呢類戲。」提到彭浩翔很自然就會拿來比較，同期出道都是70後的導演，葉念琛笑言：「拍戲唔係同人比較，而且唔係拍同類電影。如果真係要講，彭浩翔電影比較男性，我就好女性。」
雨僑高登絲打學爆粗
高登巴、絲打層面甚廣，當中不乏專業人士，原來藝人雨僑都是絲打一份子，緣起自拍攝《天》片戲中粗口妹的角色：「大蕭生（蕭若元）話你想學粗口你上高登網睇吓啦，睇睇吓上咗癮，家每日都要睇。」
粗口代號意象高
雨僑覺得以代號代替粗口的意象很高，特別欣賞「向左走向右走」、「Hi」等涉及男性器官及動作的粗言：「唔係要標榜粗言穢語，不過真係好有心思。自己最鍾意睇係吹水區，因為內容包羅萬有。」
雨僑作為被高登人稱為CD-R，只能讀（帖）不能寫的高登妹，希望有機會出席各巴、絲打的聚會：「不過有時要避忌吓，唔想俾人話抽水，好似上次反國教我都係着黑衫默默支持。」
故事大綱：全天候監控男友
《天生愛情狂》故事是由真人真事啟發而寫成，內容包括愛情的至理名言「媾女容易撇女難」。人氣西餅師傅張泰林（張智霖飾）在偶然之下結識了溫婉可人的靚護士鄺美寶（劉心悠飾），二人迅速墮入愛河。
暴力傾向
可惜甜蜜是短暫的，泰林慢慢發現到美寶不但多疑、善妒、控制慾強，更恐怖的是有輕微的暴力傾向。除了全方位24小時監視男友的行蹤外，更偷偷地掌握了他的電腦、微博、facebook和手提電話的密碼。同時間泰林的舊愛（苟芸慧飾）突然出現，在比較下自知新不如舊。不過天生瘋狂行為的背後，原來有個不為人知的秘密……
上映日期：10月25日