鄭家純次子鄭志明今日娶妻，鄭家上上下下當然都好希望早前入院嘅彤叔鄭裕彤，可以出院飲呢杯孫新抱茶，但睇嚟機會唔大，事關八方噚日喺跑馬地養和醫院等咗成日，都未見彤叔出院，唔通彤叔等到今日至出院趕去酒樓做新太老爺？
純官如常封嘴冇回應
日日去醫院探病嘅純官，噚日如常一早去咗養和。經過十幾日嚟嘅勞碌，純官個樣明顯殘咗好多，冇法啦，又公佈業績，又要做公職，又要撲去醫院探老竇，試問點可以唔殘？純官離開醫院時都有好多記者問佢，彤叔可唔可以出院飲喜酒；但戴住口罩離開嘅純官如常封嘴，冇答問題就離開。純官嘅大仔鄭志剛噚日亦去醫院探彤叔，同純官一樣對記者「沉默是金」。
咪以為家有喜事嘅鄭家對傳媒好冷漠，事關佢哋都搵人買咗啲西餅同汽水，畀守候喺醫院外嘅傳媒享用。