每屆奧運攞獎嘅香港運動員，郵政署都會精心製作紀念郵票，同全港市民一齊分享呢個珍貴時刻。「香港女車神」李慧詩喺女子場地單車凱林賽勇奪銅牌，出郵票又點會少咗佢嗰份，下個月25日就有得賣啦！
記得Sarah上月由倫敦凱旋返港後，除咗出席連串慶祝活動，期間仲同郵政署開會畀意見，經過精挑細選，終於揀出4張靚相印成郵票（圖），Sarah踩車英姿當然唔少得，仲有兩張「咬牌」嘅招牌動作，最特別係嗰郵戳，設計都係參考Sarah比賽嗰陣嘅姿勢，好有紀念價值。
首日封連同已蓋印郵票都只喺賣16蚊1毫，小版張40蚊就有交易。仲記得04年「乒乓孖寶」高禮澤/李靜套紀念郵票發售嗰陣，好多間郵局都大排長龍；Sarah家人氣高企，睇嚟人山人海嘅場面，10月25日會再次出現啦！