梁振英在七月十六日提出明年一月起，接受65歲長者申請，通過資產審查後，可得特惠生果金每月2,200元，預計逾40萬人受惠，每月2,200乘以40萬人，一年就要派發特惠生果金總共105.6億元，好多錢噃，因為香港人口老化得快兼且壽命之長，世界第一或第二，以後特區政府派特惠生果金，只會有增無減，係一筆幾大嘅財政負擔，將來可能食晒馬會奉獻之博彩稅有突。萬一經濟衰退，怎麼辦？林鄭月娥估計每年只派六十億元，可能係基於資產審查呢個假切，經審查後（睇吓上限資產額定咗有幾大），受惠人可能得番二十萬人左右呢。
從審慎理財角度講，申領特惠生果金要設置資產審查，係必需嘅，否則人人到咗六十五歲就有得攞，對啲年青納稅人係一個好大負擔，現時香港人口年齡嘅最大群組係45-55歲，十五至二十年後，呢批人個個每月拿取2,200元（將來還大有可能受民建聯及泛民聯手壓迫政府加碼，數字只會升，不會跌），公共財政會幾惡搞。如果唔駛資產審查，左丁山一定會去攞，或者有人鬧：「唓，你駛唔駛呀？」哦，呢樣嘢話係人人可拿嘅話，左丁山歷年交咗咁多稅，點解唔攞番一份嚟每個月當作中藥進補費/醫療費/報紙費/收費電視月費？
退休財務專家C已經過咗70歲，呢日食飯之時，講開生果金，透露佢每月都攞政府一千零九十元生果金，我哋又瘀佢：「你駛唔駛呀？你在佳寧娜食一份響螺片都唔止千一蚊啦！」財務C話：「你哋唔好嘈，政府派錢，我有資格攞，點解唔攞？我每個月左手收到生果金，右手就捐咗俾東華三院，上次收六千元現金，仲捐夠六千五㖭！」哦，原來係咁，攞生果金做善事，我哋點可以嘈佢！財務C以前做過東華三院總理，東華嘅籌募善款人員非常厲害，嘜住晒每一位退任總理，請佢哋捐出政府生果金與特殊現金派發（如去年之六千元），好多退任總理覺得係舉手之勞啫，於是借花敬佛，如果特惠生果金出籠嘅話，東華三院又可以每年多拿一筆善款。各大學其實可以照抄呢條橋喎，當打外滙主管W對左丁山講，佢昔日在中大聯合書院靠攞獎學金交學費，現在自己亦捐番一份獎學金俾師弟妹，相信大學籌款人員籲請老校友每月捐生果金做獎學基金，山大斬埋有柴，有得諗！