期指結算本來繼續悶場，但大陸女記者於微博的一句話，居然令中港股市爆升，認真吹脹！中證監開新聞發佈會，本來冇乜特別，但傳吓傳吓就變成救市訊號，又話停批新股，又話減印花稅，果真人言可畏！結果開完會冇事發生，憧憬又再落空。正所謂「有希望先有失望」，今日A股隨時絕望式下插。長假期前，其實無論市好市壞都應該減磅，一來放假心情輕鬆點；二來慎防歐債危機再度發酵，10月3日隨時係另一個世界。真係有好消息，到時再追未遲。昨日睇美股分析，普遍對後市仍然樂觀，認為QE3仲未炒完，目前只係大升前的整固。有分析員舉例指，雷曼爆煲後9日，標普500指數仍錄得升幅，之後才現洗倉式拋售；前年聯儲局推QE2後，也是先現獲利回套再現升浪，反映市場對消息經常有滯後反應。不過，儲局子彈用盡，底牌盡現，經過QE1及QE2後，市場仲信QE能救市？答案不言而喻。如手痕想入市炒即日，今日可吼中國七星購物（245），昨低位急升15%，成交亦配合，動力十足。公司獲廣東衛視廣告代理權，業績漸現曙光，上半年轉賺853萬銀，營業額亦增26.7%至3.3億元，目前市值得2億元，平過隻殼，易於炒上，目標賺一成，可以中秋食餐好。魏力 http://www.facebook.com/2012jason