前公牛名將「2哥」柏賓剛剛呢個周二就47歲生日，佢老婆拉莎（Larsa Pippen）周一為佢搞咗個驚喜生日派對；不過，最令人「驚喜」嘅係，佢戰友「波神」米高佐敦同女友耶維蒂（Yvette Prieto）突然出現。波神百忙中都出嚟為老友慶生，認真唔話得！
生日會星光熠熠
同柏賓有3個小朋友嘅拉莎，日前幫老公搞咗party，場面勁墟冚，有成75人到場；當中梗有唔少名人啦，好似公牛班主連斯杜夫、早前俾人追債追到褲都甩嘅名宿安東獲加，同埋公牛今季新兵穆罕默德都有到場。但係最令人意外嘅係，最近俾萊德盃美國隊隊長盧夫，任命為榮譽隊員嘅米高佐敦，帶埋女友耶維蒂突然殺入會場，同昔日一齊拎6隻冠軍指環嘅老戰友賀壽！
兩人一見面，當然要攬一攬先啦；話晒都係多年隊友同老死，呢一個擁抱深情到爆；如果公牛迷現場見到，都應該會為之動容。之前「2哥」話過熱火嘅勒邦占士，好波過米高佐敦，以小氣見稱嘅波神唔介意不特止，仲攜眷出席，同柏賓夫婦一齊合照，認真難得。男嘅有型，女嘅索爆，若果呢張相賣落信和，應該都吸引唔少上一代公牛球迷。
兄弟舞池1on1
老友生日，唔多鍾意跳舞嘅佐敦，都畀足面落場跳番part；聽講壽星公柏賓見狀，仲即時落去鍊番轉，至於邊個贏，柏賓第2日就好風趣咁話：「我又唔係評判，點知呀？」
周二去咗參加萊德盃名人賽嘅柏賓，講番話今年生日特別難忘；呢位現時公牛大使話：「真係好令人難忘，我完全冇諗過個派對咁多人，真係好感謝我老婆。」未來3日萊德盃比賽，柏賓同波神都會全程直擊，到時二人有大把時間傾波經啦！
