立法會下月10日復會，20幾位候任議員噚日去立法會綵排宣誓，做好上任準備。相信係今屆議會內身形最具份量嘅金融服務界張華峯，噚日亦首度現身議事廳，八方見佢一入去就四圍同人吹水，唔多肯坐低，唔通係擔心張凳唔夠佢坐？有信仰嘅議員通常都會揸住聖經宣誓，民建聯蔣麗芸雖然係天主教徒，卻冇咁樣做，唔通係「假信徒」？阿Ann堅稱只要心中有神，用邊個版本宣誓都冇所謂喎。
陳維安冷待傳媒
立法會候任秘書長陳維安亦親自落場，喺議事廳協助候任議員綵排宣誓儀式，但對議員非常友善嘅佢，卻有啲冷待傳媒，噚日有電視台記者追到佢面前，問佢交接工作做成點？點知佢竟然耍手擰頭唔肯講，莫非以為自己仲係做官嘅副局長？