卡卡話晒都係前世界足球先生，雖然近年因為傷患影響表現，但呢位皇馬中場喺今季正式比賽連半分鐘出場時間都冇，實在有啲講唔通。等了又等，卡卡終於有機會，喺周三巴拿比奴盃賽事正選上陣，大演帽子戲法，幫皇馬8:0大勝哥倫比亞球隊百萬富翁。不過卡卡今次「百萬回歸」係咪鹹魚翻生，似乎仲未樂觀。
皇馬U10青訓小將艾斯基拉喺周一不幸車禍喪生，周三呢場比賽賽前先進行默哀。皇馬喺呢場波只係半力出擊，C朗、卡斯拿斯同沙比阿朗素等主力都冇候命，正選陣容除咗奧斯爾、基迪拉同希古恩外，全部都係年青球員同埋一隊邊緣人，當中包括畀摩帥徹底打入冷宮嘅卡卡。
入3粒助皇馬友賽贏8:0
面對實力差好遠嘅百萬富翁，卡卡上陣61分鐘表現搶鏡，入3球兼貢獻一次助攻；加埋荷西卡利祖同莫拉達各入兩球，同賓施馬後備入替埋齋，完成8:0大捷。主帥摩連奴賽後講到卡卡嘅前途：「卡卡同全隊其他球員一樣都踢得好好。只要球員有鬥心，教練就願意派佢哋上陣，卡卡同其他球員嘅表現證明，教練可以考慮用佢哋。」我求大俠就覺得摩帥嘅言論太行貨，其實如果佢仲信任卡卡嘅話，之前幾場西甲同歐聯，點會連後備入替嘅機會都冇。睇怕之後嘅皇馬比賽，卡卡都要繼續喺後備席齋坐。
皇馬本來喺今夏想將卡卡出售，據講土耳其嘅加拉塔沙雷同埋巴甲山度士，到家仲對佢有興趣；但以卡卡稅後年薪高達900萬歐元，同皇馬合約要到2015年先完結，除非佢自己肯減薪走人，否則皇馬要送走佢都唔容易。
卡卡球場失意，但同老婆卡羅琳（圖左）同囡囡（圖右）一家三口似乎就樂也融融。卡羅琳日前喺佢Twitter度晒幸福，上載咗佢抱住個女嘅相。
