無巧不成話，本周球壇多則新聞皆圍繞中堅退出國家隊，先講英格蘭的泰利。明明法庭都判泰利種族歧視安頓費迪南不成立，英足總卻堅持要再審一次。就像法庭都判咗阿仔冇偷嘢，點知返屋企阿媽仲係唔信阿仔；阿仔嬲嬲哋，以拒絕再為阿媽洗碗掃地作為報復，諗落都好合理。泰利退出後，又引發新討論，教頭鶴臣應否重召里奧費迪南？英格蘭傳奇門將施路頓率先勸鶴臣別再打里奧主意。理據是國家隊應向前看，何不多給機會加利卡希爾及尼史葛？這點我絕對贊同，一來年屆33歲的里奧表現已大不如前，今夏歐國盃更考慮到其體能未必可應付一周兩賽而落選。現在曼聯本身都鬧中堅荒，菲爾鍾斯同基斯史摩寧仍在撐枴杖，里奧分分鐘連曼聯的比賽都應付不來，還要他老人家出山？實在有點不人道。同時間在香港，本周亦有李志豪退出代表隊的消息，一聽之下不禁「唉」了一聲。近年公眾對港隊的關注度像有所提升，今年2月對中華台北的友賽便吸引了逾5,000球迷入場。香港本身具競爭意義的比賽不多，正當大家都期待年尾的東亞足球錦標賽外圍賽，有機會跟澳洲、北韓等較量時，卻又傳來壞消息。現役中堅裏，陳偉豪受傷患困擾下，連「好打得」的李志豪與「更打得」的吳偉超都不約而同退出。當然我會尊重球員意願，但作為球迷，不禁嘆多句：「唉！」方柏翹now足球評述員