狼振英做咗特首只係兩個幾月，政治炸彈爆完一個又一個，成班AO私下坐埋都大嘆度日如年，唔少人索性跳離熱廚房，好似被視為叻仔嘅唐唐前新聞秘書陳維民（Darryl），就已經轉職金融管理局做高層。暫時未甩到身嘅，點捱呢？八方聽聞AO內部有三招防狼求生絕技，希望搵到條生路行吓。
第一招 遠走高飛
就算跳唔出熱廚房，搵位調都未嘗唔係避禍方法。有AO聽聞，唔少同僚都密謀調位，最希望調去一啲唔使應酬隻狼以及由「梁粉」兵團領導嘅部門啦，而首選則係申請外調，話調去海外辦事處就最好，總之有咁遠走咁遠、唔使去立法會受靶就very good嘞。
第二招 機不離身
假如搵唔到位調，惟有打醒十二分精神「做好呢份工」，希望苟存性命於亂世，保命符之一係「機不離身」，必須帶定錄音機同狼振英兼狼親信開會。點解部錄音機咁重要？有AO點醒八方，話梗係要錄低佢哋每一字、每一句，再跟足佢哋嘅說話去做，萬一好似隻狼咁，明明講過要喺邊境禁區搞內地人免簽出入境，事後又唔認賬，執行嘅AO至少有錄音在手，唔使無辜孭黑鑊吖！
第三招 封嘴鵪鶉
有AO話終極自保撒手鐧，就係封嘴扮鵪鶉，乜都唔向上頭建議、亦都唔反對任何「硬膠」政策，費事惹嚟唔肯聽意見嘅狼班子dislike，深信本住「多做多錯、少做少錯、不做不錯」嘅原則先可以喺狼政府苟且偷生。mailto:[email protected]