風水輪流轉，民主黨由過往泛民第一大黨，變成同公民黨平起平坐，箇中原因自然由佢哋自己進行「死因調查」。雖則佢哋人少少得嗰六件，但勝在仲有唔少知心友，好似三位功能組別嘅泛民新丁，教育界葉建源、會計界梁繼昌，以及資訊科技界莫乃光咁，已經決定以後每星期同民主黨碰頭一次，互相交流議會意見。五位民主黨候任議員噚日本來約咗三位新盟友開會，但最終獨莫乃光出席。民主黨新黨團召集人涂謹申話，以後定期同佢哋開會，希望合作愉快。