上季膝蓋韌帶受傷嘅公牛控衞戴歷路斯（D Rose），今季將會用大部份時間做復健，不過同佢簽咗10年2.5億美元（約19億港元）贊助合約嘅adidas，又點會畀呢棵搖錢樹喺大家眼中消失？所以，佢哋幫路斯拍受傷後嘅紀錄片之餘，波鞋梗係都照出啦；最近就推出咗新一輯波鞋廣告，講D Rose受傷之後，全個芝加哥都即時靜止咗；但係當呢位「風城之子」復操之後，整個城市即時有番生氣。最正一幕，當然係路斯重披公牛波衫，喺球員通道行出去，回頭一笑個型仔樣啦！呢個廣告有心思兼型爆，但係D Rose就預計要去到季尾先復出到，三間牌咁快出呢個廣告，真係完全唔怕邪；希望路斯真係可以好似個廣告結尾咁，笑住復出啦！