署名為「一群新東選民」噚日喺報紙登全版廣告，題為「陳志全，請收起你的偽善！」，話人民力量立法會候任議員陳志全（慢必）擔任CEO嘅香港人網，充斥色情物品，內容淫穢不堪，無獨有偶，落選新界東嘅民主黨黃成智，噚日同班家長去警署報案，話慢必主理嘅人網有色情資訊，可能觸犯《刑事罪行條例》，要求警方調查，又話慢必應該為此道歉。成智話今次舉報同選舉無關，係唔係呢？八方相信讀者自有分數。慢必回應時話唔少討論區都有呢類成人色情資訊，違規嘅話板主會處理。係咪成智敗選唔服氣搞你先？慢必笑騎騎話「唔會掛」，但就話睇過成智選舉後嘅訪問，感受到對方有啲唔服輸囉。