昨日升幅榜中，華藝礦業（559）爆升74%，理由是主席王顯碩以每股0.15元，向獨立第三方蔡氏悉售所持8.13%股權，較前收市價溢價68%。蔡氏同名持有之股份尚有明豐珠寶（860），但不知當中有何關連；王顯碩售股後亦不再持有華藝，似是賣盤離場。有賣盤概念，但華藝發行股數得29.95億股，主席僅持約2.44億股，上述交易涉資不過3650萬元，但就令公司市值升近2億元，表面看倒也化算。不過抬高股價又有何用？除非隻殼真係有動作跟尾搞注資再批股，否則股份賬面價值冇乜重大意義，唔少三四線股的大股東根本不在意股價跌到殘，假如再多幾間公司造高股價，應該是預告大市短期氣氛不致太差，趁市旺（相對來說）搞搞融資活動。事實上大市的確唔似會再出現上半年暴跌現象，除了歐美狂放水，全球表現最差的中國A股都似乎見底回升。A股已連續幾年跑輸全球股市，拖累埋以中資股為主的本港股市，睇睇H指同恒指差距越來越遠，今年以來恒指升12.6%，H指則跌1.6%，上證綜指跌6.5%，就知大陸股市幾咁陀衰家。
獲准管理保險資金
昨日市傳中證監開記者會講暫停發新股，但隨即被否認，之後港股尤其中資證券股照升如儀，市場資金最醒目，應掌握若干消息。另外中國保監會昨公佈新批准9家基金管理公司可受託管理保險資金，當中包括海通證券（6837）旗下基金管理公司，此證券股一向偏強，入市首選。歐陽風