【北角渣華道】
有「A&F柯震東」之稱嘅趙勁皓（King），佢嘅40吋雞扒胸兼陽光笑容令佢成為影圈搶手貨，羅仲謙所屬嘅星皓、周秀娜所屬嘅G.M.E、電影公司老闆蕭定一，甚至周柏豪所屬嘅Starz近日都出招，希望斟到King簽約。
即將拍片
搶King戰擾攘約兩周，終於有結果，King前晚8點半約咗周秀娜經理人Roy喺北角渣華道熟食中心，邊開餐邊簽賣身契，King亦成為娜姐師弟。簽約前，King喺港鐵站等call嗰時買咗杯汽水飲，又姿整搽潤唇膏。
雖然簽約儀式喺大排檔低調舉行，冇五星級大酒店盛大排場，又冇大鑼大鼓造勢。不過，King簽約後都笑到四萬咁口，係咁同Roy等人碰碗飲酒，之後King又識做夾餸畀大家。同場仲有獅子山影畫老闆黃永峰（Charlie），原來佢打算邀請King參演下月開拍、投資約1,500萬嘅新片《Mrs. Boo》，有意力捧佢做男神。Charlie去年曾開拍由周秀娜同羅仲謙主演嘅青春片《熱浪球愛戰》，前晚King好留心聽Charlie講解角色。
採訪：比華利
攝影：陳志嵐