幾大華資地產商基本上交晒棒，第二、三代全面曝光講業務，唯獨恒地（012）例外，主席李兆基話就話將香港業務交畀細仔李家誠（Martin），大家見得佢最多都係同太太徐子淇去ball，但聽講Martin真係逐步接手，上至樓盤，下至美麗華（071）旗下餐廳都積極參與管理。Martin近年除咗搞美麗華，將形象年輕化，仲不停學做地產生意，恒地賣緊嘅新盤馬鞍山迎海，Martin做好多幕後工作，今個月中佢亦現身售樓處，學阿爸，即係四叔評論樓市。好似話，Martin嚟緊會多啲喺財經版曝光，唔係淨係喺娛樂名人版先見到佢喎。
幫The French Window大翻身
除咗迎海，Martin最近亦有其他新嘢要推銷，就係喺中環IFC國金軒隔離間法國餐廳The French Window，呢間高級法國餐廳2010年底開，格調高，菜式賣presentation多，一個set lunch要400至500蚊，以前同家嘅金管局總裁任志剛同陳德霖都有幫襯。見到家啲人食法國菜都偏向隨意啲，Martin今年初建議裝修過間餐廳，換大廚，改菜式，等客人食得自在啲，家set lunch只係300蚊左右。餐廳冇改名，周二已經重新開張，Martin第一個捧場，低調地同三位同事食晏，大廚都唔知佢係老細呀！李華華mailto:[email protected]