之前晉佳講到天然氣服務及設備股，有唔錯嘅投資機會，仲介紹過宏華（196）、爽組合孫兄亦欽點過珠江鋼管（1938），除此之外，安東油田服務（3337）都係唔錯嘅選擇。簡單形容安東油田嘅業務，就係類似地產行業中嘅裝修公司，幫啲天然氣開發商鑽井，等佢哋可以勘探。天然氣屬於較環保同埋成本較低嘅能源，唔少內地工廠都想轉用燃氣生產，但係需求爆燈，供應唔夠，之前仲曾經鬧氣荒。由2007年起，內地成為天然氣進口國，近年進口比率去到接近三成，為咗唔倚賴進口，加快開發天然氣係內地一項重要任務，況且，美國講到有條件大規模開發頁岩氣，令中國想急起直追，更加有利天然氣行業發展。政策方面，嚟緊面對西氣東輸三線全面開工，加上天然氣「十二五」規劃有機會好快公佈，規劃將涉及天然氣儲氣庫建設，睇嚟行業受惠程度唔會細，中長線應該係強勢行業。講番安東油田，2007年佢主要係油氣設備產品嘅供應商，近年轉型為集中提供天然氣鑽井服務嘅企業，由提供硬件轉為提供軟件，提供服務嘅收入比例成功由2007年嘅23%，提升至舊年嘅七成。安東油田嘅天然氣鑽井服務可以大致分為鑽井、完井同井下作業，以往唔少客戶只會幫襯其中部份服務，但今後公司希望爭取更多一體化嘅服務，即係幫同一客戶一條龍做晒鑽井、完井同井下作業。
中短線睇2.4元
事實上，材料成本波動，頗為影響安東油田嘅盈利表現，但如果佢能夠提供更多一體化服務，就可以提升利潤率，抵銷原材料成本波動嘅影響，公司毛利率就由舊年上半年43.2%，升到今年上半年嘅47.9%。市場需求增加，亦令佢今年上半年收入上升52.9%，純利更大幅增長1.46倍至1.25億人民幣，每股盈利5.92分，相信未來增長依然唔錯。之前英國《金融時報》分叠做咗一個幾版紙嘅天然氣行業專輯，幫手唱到呢個板塊熱一熱，結果竟然換嚟天然氣股份月中開始唞氣，不過整固咗半個月之後，係時間考慮吸納，安東油田中短線可以睇2.40元。晉佳本欄逢周一、三及五刊出