又有本港上市公司同英超球隊拉上關係喇！專做空運艙位批發嘅瀚洋（1803），宣佈同昆士柏流浪（QPR）簽訂一年贊助合約，成為QPR首間官方物流夥伴，瀚洋個「ASR」Logo會印喺球會嘅練習球衣上面。但要留意，今次贊助只限於練習球衣，即係正式比賽嗰陣，瀚洋Logo唔會喺球場出現，宣傳效用究竟有幾大，相信大家心中有數。再講，瀚洋嘅業務同踢波大纜都扯唔埋，究竟點樣可以做到公司所講嘅雙贏效果呢？QPR主席Tony Feranades就最開心，話球隊係繼紅魔鬼曼聯之後，第二間獲贊助練習球衣嘅英超球隊喎。睇真啲，QPR今季成績認真麻麻，踢咗五場未贏過，家排尾二，再係咁落去隨時要降班，到時Tony主席肯定笑唔出囉。