米芝蓮乳豬股喜尚（8179）主席兼大股東黃君武，今年初無厘頭向公司借990萬，話要開兩間拉麪店，至今影都冇，黃主席位千金黃泰瑩就話，黃主席已經使咗100萬搵專人設計拉麪店品牌，好有心搞，但未搵到舖位之嘛。
喜尚主席問公司借錢
黃泰瑩係喜尚市場推廣經理，最近幫手宣傳7月新開嘅新店「家常便飯」，難免被人問到黃主席借錢搞嗰間拉麪店開咗去邊，點知原來仲未租到舖！佢呻話「睇勻港九、新界，睇到鞋都爛」，只怪家舖租升得太厲害，真係租唔落手，惟有hold住先，今年內未必搞得成。照咁講，黃主席未租到舖，未搞食物質素，就花成百萬請有「品牌醫生」之稱嘅設計師李永銓幫手做品牌設計，會唔會使咗冤枉錢呢，家得番890萬咋喎！