新界東北嘅割地賣港風波一發不可收拾，但係主理呢件事嘅謬波局長，前日中午竟然得閒喺港麗酒店，同公民黨毛孟靜同會計界梁繼昌食晏密斟。
睇吓有乜手尾跟
八方當日所見，成餐飯最滔滔不絕嘅固之然係毛姨姨啦，呢點冇人會覺得奇怪㗎；梁繼昌亦不時插嘴喎，反而謬波呢？全程不時皺晒眉，露出一副無奈樣，呢餐兩男一女「嬲」字飯，有乜咁難啃呀？八方問過梁繼昌，佢話當選後已邀約謬波會面，始終佢都係上屆會計界代表，想睇吓業界仲有冇乜手尾可以接手；而毛姨姨咁啱都想搵謬波傾嘢，結果促成佢哋「三人行」。梁繼昌話呀，席間當然有傾新界東北發展計劃，引述謬波堅持唔撤回，冇乜新意；佢就向謬波先小人後君子，表明積極跟進佢嘅劏房醜聞，絕對唔會放過佢。哦，真相大白了。