【本報訊】在時間面前，每個個體都輕盈若煙、流動如水，即便是手臂上以為永恒不滅的胎痣，原來都有消失一天。如果在生，今日已75歲的麥錦美，小時候最愛摸哥哥麥柏左臂上一幅長長胎痣，大叫哥哥的花名「大聲公」。「嗚、嗚、嗚…」二戰時幾聲防空警報，令6歲的錦美與家人走散，一散就是70年。尖沙嘴舊居的街巿被拆、連臂上唯一可以辨認的記印也都隨年漸淡。記者：張嘉雯
兵荒馬亂的年代，餓死在路上的人，大腿上一塊好肉也沒有，再親的人永別，也沒機會說再見。麥柏七兄弟姊妹全部由油麻地的寧大姑接生，與父親及大細媽一家十口住在尖沙嘴街巿，父親先是賣生果、後來賣豬肉、再後來賣故衣，「嗰時冇錢，好多人都買舊衫」。
「係熟人抱走佢」
「嗰時日本仔打到嚟，老竇搵個籃入住啲出世紙，我拎住走呀走，啲人話啲出世紙有英文字，俾日本仔見到實斬你，斬你喎，唔驚呀？唔知出世紙咁矜貴，咪嗱嗱臨燒晒佢囉。」
1943年冬天，麥柏回鄉探望祖母，家人在港卻碰上「走飛機」，「日本仔轟炸呀，嗚嗚嗚，個個雞飛狗走，亂晒坑，細路哥咪俾人拐咗」。麥柏是大哥，回港後與父親四出打探弟弟的下落。「唔識嘅人佢唔會跟㗎，畀咩佢都唔會要，所以我哋都話係熟人抱走咗佢。」
麥柏形容，錦美「頭大大」，前額一綴頭髮，「腳踭唔到地，個個都話佢短命」。小腿上種了波子大小的牛痘，「種咗好大粒，我哋成日笑佢㗎」。大哥和么弟，感情最要好，「好調皮㗎佢，細路哥，梗係四圍飛㗎啦，咁多個細佬，最生鬼係佢，佢對我好好，最跟我，成日摸我呢個胎痣，唔知點解大大吓消失咗」。麥柏邊說邊捲起左邊衣袖，「我最鍾意阿美，一話佢，即刻乖，一喊呢，又喊到收唔到聲，嘩，呢條友咁犀利，最記得佢我叫大聲公，一叫，我即刻追佢囉，啲細佬妹都唔係咁叫，喺呢條仔咁叫，哈哈！」七兄弟姊妹飯也吃不飽，遑論玩具，平時愛玩煙包的公仔紙，「冇嘢玩㗎，玩架爛車囉，有架爛咗嘅BB車，我哋學人揸車，拉住支棍，得三個轆，咪咁玩來玩去，擺軚呀，喺街巿二樓推囉」。
父母臨終不忘么仔
興奮回憶童年趣事，卻又忽然若有所失，「原本以為仲有一絲希望，佢會認得個紅磚街巿，但係家街巿都拆埋」。去年麥柏在長者中心得悉紅十字會有尋人服務，遂依指示到入境處查核，「啲人話佢仲未死，可能仲喺度㗎喎……不過改咗名，你唔知㗎嘛，大海撈針，可能改咗名死咗都唔知㗎」。
1980年，麥柏父親麥顧賢過身，母親甄換亦在十多年後去世，「阿爸臨終時講呀：『有個細佬㗎，你記得呀，阿大聲，你睇吓呀邊個登吓報啦。』我哋呢啲懶人，文化太低，又唔識點登（報），一耽就耽咗十幾年，幾年先搏命搵，到阿媽『執笠』嗰陣，又同我講，『最緊要，記得仲有阿美。』」
一家十口，餘下麥柏和一弟一妹在生，「希望搵到，同阿爸講聲：『喂，搞掂喇！』春秋二祭可以向父母稟報，廿幾年你估講笑呀，個老竇最緊要佢，掛咗好耐，掛咗一年又一年，十年又十年，廿年又廿年，講講吓又30年」。如果最終找不到怎辦？老人不知所措，「呢啲……了㗎喇」。