近日喺YouTube流傳一段名為〈香港電台謝志峰同女友險披車撞到〉嘅短片，影到港台節目《城市論壇》主持人謝志峰同一女子過馬路時，險被私家車撞到嘅一幕。八方睇過條片，驚險度不足，但單係個標題就十分驚嚇，皆因出名係好好先生嘅謝志峰結婚多年，女都生咗兩個，點解會爆出一位「女友」，仲要斷正俾人拍埋片㖭﹖
睇完條片得啖笑
謝志峰日前同八方講起呢件事，佢話睇到個標題就嚇死人，睇完條片就得啖笑。原來呢條片攝於去年8月，香港記者協會同攝影記者協會發起遊行，抗議警方喺國務院副總理李克強訪港時，警方打壓採訪自由，八方記得有成300幾個行家參與是次遊行。
謝志峰話，當日確係拖女參加遊行聲援，而佢嗰日由警察總部過馬路時，又確係同身邊嘅女伴險被車撞到。不過，佢苦笑話，條片唯一唔正確嘅係，標題多咗個「友」字，因為片中年輕女子其實係佢個大女愷寧，叫大家千祈唔好諗歪。