黃師傅Freddy，專職麪包師。私房餅店寶號Theme Cake出品，貴精不貴多，一天生產一個起，三、四個止。慕名而來為食鬼訂餅須排長龍！其實黃師傅心愛蘭花並另類小動物，例如黃金花蛇、寵物箭豬等等，下班整餅之餘瞓身育蘭。這便是生活：不用太愁錢，不會悶，不怕花時間，因由時間用在自家樂趣，晨昏都是自己選擇。朋友聞西大半年前給我嚐了黃師傅佳作，榴槤芝士餅，驚為天作。比下了不少名店出品，當然在下榴槤並芝士餅粉絲，加分不在話下。這個fan識硬啦，即刻fb加為朋友。縱使如此，下一輪得嚐Theme Cake製造也須等候近半年，不是他忙便是我出了差。中秋時近，黃師傅通知，榴槤呢排靚，閣下在港否？一拍即合，黃昏收到，方整餅盒，未開那香越過紙牆，香噴噴得不能，好暈！時近中秋，收到遠近親友賀禮不少，樣樣皆心血，阿媽如果還在，這時節肯定歡心，潛台詞：仔啊仔，睇番你細細個，幾怕你日後只有兩條路，古靈精怪、自閉！好彩大大吓平庸有餘，仲得到好大一伙朋友㖭，相信阿媽在生拜月光，加多兩錢肉緊謝神恩。食緊如此好嘢，我也想起為食到上山下海的發仔哥，他曾教過我去九龍城買原汁原味馬來甘苦香甜榴槤哩。古老傳統家庭，過節禮物一般敬老酬神謝祖先，入口落胃者少。面對黃師傅精製金黃貴氣榴槤芝士餅，咁新鮮放上神枱幾日當然不適當，變壞傷腸肚祖先都唔願啦！其實老友正記老闆阿正剛剛自南海油田釣到50斤重大石斑，惟有先吃大魚，回家近午夜打開餅盒，拿出，原先只為吃少少，點知入口太美妙，榴槤肉質沒化不單止，讓你感受本來肉地但又巧妙併入奶酪，那甜輕到即止，情況東方，形式西方。讀報讀到新加坡榴槤月餅，憑照片判斷拍馬追唔上Freddy作品。什麼冰皮系列，又甜品名店「榴槤」忘返的出品相距，都唔係嗰皮，即刻食咗1/4個餅。2012中秋，黃師傅真正「榴槤」忘返月餅至入己心，照片放上fb，班友仔恨到爆！但願師傅人長久，年年榴槤系列月餅共嬋娟。成功如此簡單：專注、簡約、心無旁騖，還需一份自由自在的快樂投入作品。朋友，近期甜品已久違如此幸福感。保持如此水平，黃師傅雖然唔恨，不然發達唾手可得。