聲稱無黨無派，以獨立身份空降九龍東贏出嘅阿Paul謝偉俊，噚日晨早到東頭邨22座，聲援唔願意搬走、向房委會爭取合理賠償嘅商戶。阿Paul西裝骨骨，衣領有隻睇落似老鼠嘅襟針，八方問阿Paul，佢話係隻豹先啱。唔怪得呢個西環契仔，食咗豹子膽，借助建制派票源勝出後，再唔使咁鬼「鼠」，拍住有民建聯背景嘅黃大仙區議會主席李德康，逐個同拒遷嘅商戶握手，睇落似謝票多啲。佢仲開口撐鄉事派，話今時今日嘅香港社會，應該重視歷史，好似配合丁權發展東北嘅問題。講到明撐鄉事勢力，繼續享有特權。