被視為「梁粉」嘅體育、演藝、文化及出版界候任立法會議員馬逢國，近日被建制派發放「邊疆」，未來四年要同人民力量議員同社民連長毛為鄰，喺議事廳坐佢哋左邊。馬逢國噚日話，由於一早講明坐邊冇所謂，預咗俾人掟去難啃位。毓民、大嚿同長毛發言時，出名大聲兼隨時掟嘢，馬逢國一手指住自己右耳，話早年因為愛潛水，先後兩次整穿右邊耳膜，聽力跌咗兩成，至今都冇修補漏洞，所以唔怕人講嘢大聲，仲可以擰歪面將啲唔啱聽言論當耳邊風。至於掟嘢，馬逢國聲稱搞開電影，早已見盡唔少拆台拆佈景嘅暴力場面，認為人力同長毛都係做場戲啫，完全未驚過咁話。