渣打馬拉松又嚟，鑑於近年有人「頂包」幫人跑，田徑總會決定嚴拿違規者，淫照案主角陳冠希，就係其中一個會被祭旗嘅跑手啦。事緣今年2月5日比賽當日，陳冠希好得戚咁掛住號碼牌A5654出戰42公里全馬，俾人影晒相。比賽後有人搵番馬拉松網站資料核對，A5654選手資料與陳冠希不相稱，以為佢做假博出鏡。
違規梗係取消資格
Edison後來出嚟解釋，話自己真係有跑全程，不過原本號碼係A5716，係特登同人對調，皆因佢「唔想要個7字，同人換咗，但腳上嘅計時器冇換。」不過講乜都冇用，違規就梗係俾大會取消資格。田總主席關祺噚日透露，為咗懲戒啲頂包同違規參賽者，會執正嚟做。好似對Edison，唔止取消佢今年參賽資格，仲罰埋佢明年唔可以參加比賽。Edison話7字唔利佢，睇嚟4、5、6都唔旺佢啦。馬拉松已成為香港重要體育賽事，60幾歲嘅白韻琹噚日都話，想參賽挑戰自己，仲話想邀同樣喺超級區議會輸咗嘅民建聯「劉華」劉江華一齊較量。白姐姐話，近年有腳痛問題，做咗一輪物理治療有起色，「前年去行黃山，我都可以行幾轉。」佢話家行好多路，好似噚日就由銅鑼灣行去北角，用咗一個鐘。嘩，佢如果跑10公里，咪隨時要四個鐘先完成，不過佢話「我都包尾慣啦。」mailto:[email protected]