QE3畀市場一個藉口夾硬買上去，港股每日成交都係多返區區幾十億，但Deal Flow返來未呢？似乎並沒有。芬佬朋友話，現在佳兆業（1638）、花樣年（1777）呢啲N線內房股發債，十幾厘搶個滿堂紅，證明市場的確係多錢，尤其是對Fixed Income的產品非常渴求。但呢啲泊晒喺度無地方去的資金，就偏偏唔流入股市，後市風險似乎仍然不可睇小。芬佬朋友話，以前日理萬機、call爆機都搵唔到的專貴ibanker，依家清閒到日日坐係公司玩手指。在哪裏可以找到他們呢？不再是五星級大酒店，聞說下午3時過後，你在中環Gym場就會遇到唔少賓架在做運動。反正喺office都冇嘢搞，保持身心健康比較緊要。跑完步，就夠鐘收工喇！呢一輪裁員潮仲要搞幾耐？有賓架說今時不同往日，投行數目激增，僧多粥少令生意難做不再話下，另一個主因，是08年金融海嘯後，按監管要求不少外資行都改革了花紅制度，大幅提升底薪比重，令如今淡市，投行不能再以勁減花紅縮開支，而要焗炒人。生意難撈，如果第四季仲無起色，裁員潮唔會完。海迪