菲菲身子弱，近來仲要入院住幾日，病就好咗，仲極速瘦身。經過今次，更明白保險重要性，家喺公立醫院做檢查，最少等半年，再約見醫生又等多半年，分分鍾病情惡化速度快過檢查進度，情況有如人工升幅永遠跑輸樓價一樣。買咗醫療保險，有事至少可以去私院快手搞掂。身體受傷有醫療保，受情傷又有冇公司受保呢？咪發夢啦，不過，一間美國保險公司真係計劃推出「婚姻保險」，只要結婚當日投保，之後25年兩公婆仲喺埋一齊，就可以獲賠10萬美金。公司話希望能以銀彈政策，令夫妻有爭拗時，可以有商有量，變相維繫夫妻間感情喎。菲菲又咁睇，係就係減低離婚動機，但睇錢份上至維持夫妻名份，咁仲叫婚姻！講開保險，平安保險（2318）最近威威，事關公司開咗張世紀大單，保額達1.09億人仔。當中人壽保額2000萬、意外保6900萬，至於保費一年盛惠102萬人仔。平保一張半張大單，都幫唔到股價，加上市亂，都係忍忍手。Fifi本欄逢周二、四刊出