南華中堅李志豪前日公開發炮，話不滿港足教練摩力克（左一），鍾意選年輕球員入伍，上場友賽輸畀新加坡後又要後防球員孭鑊，所以毅然劈炮唔踢港隊。而呢位29歲守將，噚日隨少林寺練完波後，忍唔住再爆多句，「如果佢（摩帥）仲喺度教，我都唔會再踢！」講到有你冇我咁僵，志豪當然冇出席同日稍後時間喺掃桿埔球場舉行嘅操練，最終港隊亦只係得16名球員練波。
還好摩帥EQ高，面對中堅荒，仲識講笑問我求大俠同一班行家可唔可以踢中堅。之但係佢強調上次對新加坡賽後，係指摘全隊防守不濟，絕冇針對後防球員；至於點兵方面，摩帥重申揀當打同年輕球員入伍，係希望作長遠計劃，而佢好刻意咁提番00年志豪17歲於港隊出道，都係多得前荷蘭籍港隊教練（利沙雲）選佢入伍，好似諷刺志豪唔識飲水思源噃！