車路士今季不斷掃貨，貴價兵有夏薩特、奧斯卡杜斯山度士、域陀摩西斯，不過「油王班主」阿巴莫域治都唔係洗腳唔抹腳，嚴守老將續約規條。球會對季尾就約滿嘅31歲左後衞艾殊利高爾（A高）傾續約堅持只開一年合約，咁同送佢走都冇乜分別；據悉A高已經拒絕續約，其實佢根本不愁出路，兩大舊主摩連奴同安察洛堤都想搵佢，隨時會喺出年1月走人轉投皇家馬德里同巴黎聖日耳門。
同舊領隊關係良好
A高家周薪13萬鎊，以英超星級球員水平就絕對唔高，今季尾佢就約滿，車仔雖然都想留人，不過球會家就有續約政策，30歲以上球員只會開一年新約，A高梗係唔開心，一口拒絕咗。ESPN就報道，雖然A高剛剛拒絕續約，不過現任領隊迪馬堤奧就好樂觀，會留得住佢。但我求大俠就唔係咁睇，事關A高由阿仙奴出道，到車仔一直留喺倫敦踢波，加上佢愛蒲嘅性格，點會唔悶；難得佢兩位車仔舊主都好賞識佢，好似皇馬教練摩連奴，講過想買佢講咗幾年，最近仲借埋艾辛，真係念舊。而轉到PSG做教練嘅安察洛堤，就勝在球隊水喉足，20、30萬鎊周薪絕對畀得起，而且馬德里、巴黎都係歐洲數一數二嘅不夜城市，A高又點會唔心郁。
其實A高雖然已經31歲，不過活力一向唔輸蝕，上仗聯賽都靠佢入波先擊敗史篤城；加上A高明年1月就可以同其他球會傾新約，明夏就可以自由身走人，車仔想留人就要快手。
A高扭計唔續約，車路士又好似冇有怕，事關23歲新星賴恩貝特蘭已經接到班，周二場英聯盃第3圈主場6:0大炒狼隊，賴恩貝特蘭取代A高打左後衞，冇失波之餘，自己仲入一粒，連埋社區盾對曼城，今季已入咗兩球。講開車路士，除咗佢哋啱啱喺英聯盃大勝，但球會基地就出現偷竊事件，日前有唔少球員嘅銀包、手錶同埋電話都唔見咗，搞到要報警求助。
知多啲 每年一續兵工廠表表者
阿仙奴可說是對旗下年過30球員，只提供一年續約條件嘅「始祖」。喺08年，當時31歲嘅巴西中場基拔圖施華就算係兵工廠隊長，同球隊傾續約都不能例外，結果為咗一紙長約，最後轉投希臘彭拿典奈高斯；連亨利、韋拉等球星都係臨近30歲被出售。名宿荷蘭前鋒伯金，算係肯逆來順受嘅一個，喺佢退休之前都係每年一續。而車路士家都推行老將一年約政策，據講上季杜奧巴亦因為未獲兩年續約，無奈轉投上海申花。
