中秋佳節，正是起義之時。政黨蛇齋餅糭你哋食厭未？有冇興趣試吓反動基地嘅革命月餅？油麻地活化廳嘅藝術家又有新搞作，搵咗「藝壇新人王」石家豪設計一款「反加租」月餅，抗議地產霸權，高呼造反有理。佢哋仲搵咗油麻地街坊舖龍珠餅店烘月餅，實行幫襯小店，抗衡地產霸權。藝術家出手，個月餅盒設計已經好吸引，寫住「革命未成功，租金月月升」、「生活無望，造反有理」，係咪好想要呢？如果係街坊，可以剪低「活化報」月餅印花，周五前免費換領。活化廳仲預留咗一批革命月餅，等大家捐錢幫助八名喺六四遊行被檢控非法集會嘅社運朋友，支持公民抗命！