永安集團太子爺郭永淳嘅34歲前妻伍志恆（Connie），曾經喺微博開名鬧情敵餅女楊愛瑾（Miki）係狐狸精，話Miki介入自己嘅婚姻令佢同老公結束咗九年嘅夫妻關係，亦因為咁搞到自己百病纏身，手術都做咗十次，出入仲要扶枴杖。Connie又因為厭食症體重得番70磅，舊年仲要返上海長時間休養，贍養費都要打咗一輪官司先至加到每個月四萬幾。Connie慘痛經歷過去，經過差唔多一年休養，前日兩點幾就見Connie一個人喺銅鑼灣出現。
行商場冇心水
Connie雖然仲係揸住枝枴杖，不過都係用嚟輔助，而且精神都飽滿番，面色亦都已經好好多。Connie首先行咗入一間電訊公司，攞咗張身份證畀店員影印，搞咗一輪手續問咗一輪問題之後，Connie就行咗去金百利商場行街，見佢望咗一輪冇乜心水，就落返樓下講電話同打訊息。企咗一陣跟住就行咗去百德新街，睇嚟Connie已經重新投入返社會，亦學識愛錫自己，佢嘅朋友睇見應該開心。
採訪、攝影：梁繼光
