俗語「一鼓作氣、再而衰、三而竭」再次應驗，就算伯南克無限QE，都難救起經濟。現時好友子彈用盡，淡友就手握歐債及財政懸崖兩件大殺傷力武器，牌面高低立見。魏力周二提及，道指與運輸業分類指數現背馳，很可能預示美股見頂，結果當晚就掉頭「大陰燭」急挫；港股今日如裂口急跌，將形成「島形頂」，形勢十分凶險。市況急轉直下，係時候檢討吓近期推介，周二介紹麗悅酒店（2266）今易名帝盛酒店，前日突破前浪頂1.90元，昨收十字星，今日如向下可先獲利。上周五的鱷魚恤（122）急升後營造旗形，隨時好似上周一推介的景福（280）咁有下一波攻勢，可再坐一會。經濟堪憂，油價挫至7周低位，早前推介的安東油田（3337）衝上兩蚊後已回吐一成，大戶於1.70元水平不斷收貨，似乎仍有下文，不妨留意。於阿根廷經營油田開採的股仔長盈集團（689）業績冇睇頭，但昨逆市大成交湧上，圖表形成「杯柄突破」。唔理個市，純睇圖小注炒，呢隻有得諗。公司最大賣點係持有38億元油田資產，但市值僅6.6億元，PB連0.2倍都唔到，近期賣殼成風，話唔定長盈係下一個目標！魏力 http://www.facebook.com/2012jason